சமீபத்தில், ‘வட இந்தியாவில் பிறந்தவர்’ என்று முருகக் கடவுள் குறித்து தெலுங்கு சினிமா தயாரிப்பாளர் நாகவம்சி வெளியிட்ட எக்ஸ் பதிவு, தமிழ்நாட்டில் சர்ச்சையை ஏற்படுத்தியது.

“வரலாற்றைத் திரித்து தமிழர்களை இழிவுபடுத்தினால் கடும் விளைவுகளைச் சந்திக்க நேரிடும்” என்று நாம் தமிழர் கட்சியின் தலைமை ஒருங்கிணைப்பாளர் சீமான் எச்சரித்துள்ளார்.

நாக வம்சியின் பதிவுக்கு சைவ சிந்தாந்த அறிஞர்கள் மத்தியிலும் எதிர்ப்பு கிளம்பியுள்ளது. இந்த நிலையில், ஒரு தெலுங்கு ஊடகத்திற்கு சமீபத்தில் அளித்த பேட்டியில் இந்த சர்ச்சை குறித்து நெறியாளர் நாகவம்சியிடம் கேள்வி எழுப்பியபோது, “நான் இந்த விஷயத்தை புறந்தள்ளிவிடவில்லை. நான் உடனடியாக அவசரகதியில் இதற்குப் பதிலளிக்க விரும்பவில்லை. என் விளக்கம் சரியான நேரத்தில் வரும்,” என்று மட்டும் அவர் பதிலளித்துள்ளார்.

ஆனால், இதுகுறித்து அவரது விளக்கத்தை அறிய பிபிசி தமிழ் எடுத்த முயற்சிகள் பலன் அளிக்கவில்லை.

உண்மையில், தமிழ்க் கடவுளாகப் பார்க்கப்படும் முருகன், வட இந்தியாவில் எவ்வாறு வழிபடப்படுகிறார்?

சர்ச்சைக்கு வித்திட்ட புதிய பட அறிவிப்பு

இயக்குநர் திரிவிக்ரம் இயக்கத்தில் ஜூனியர் என்.டி.ஆர் நடிக்கும் புதிய படத்தின் அறிவிப்பு கடந்த சில நாட்களுக்கு முன்பு வெளியானது. ‘காட் ஆஃப் வார்’ என்ற தலைப்பில் படத்தின் டீசர் காட்சிகள் வெளிவந்தன.

படம் தொடர்பான அறிவிப்பைத் தனது எக்ஸ் பக்கத்தில் வெளியிட்ட தயாரிப்பாளர் நாகவம்சி, “வடக்கில் பிறந்து, மையப் பகுதியில் உருப்பெற்று, தெற்கில் போற்றப்பட்டு… இப்போது, ​​பிரபஞ்சத்திற்கே சொந்தமாக இருக்கும் ஒரு காவியம்” எனப் பொருள்படும் வகையில் ஆங்கிலத்தில் குறிப்பிட்டிருந்தார்.

நாகவம்சியின் இந்தப் பதிவு தமிழ்நாட்டில் விவாதத்திற்குரிய பேசுபொருளாக மாறியது.