ஈரோடு மாவட்டம், இடையன்காட்டுவலசு, நகராட்சி நடுநிலைப்பள்ளி (இந்நாள் மாநகராட்சி உயர்நிலைப்பள்ளி)-யின் முன்னாள் (1991-1999) மாணவ, மாணவிகள் மற்றும் ஆசிரியர், ஆசிரியைகள் சந்திப்பு நிகழ்ச்சி 20.09.2026 அன்று  ஈரோடு மெரினா ரெஸ்டாரண்ட் விவாஹா ஹாலில் நடைபெற்றது.

 

ஈரோடு மாவட்டம், இடையன்காட்டுவலசு, நகராட்சி நடுநிலைப்பள்ளி (இந்நாள் மாநகராட்சி உயர்நிலைப்பள்ளி)-யில் 1991-1999 வரை பயின்ற மாணவ, மாணவிகள் இணைந்து முன்னாள் (1991-1999) மாணவ, மாணவிகள் மற்றும் ஆசிரியர், ஆசிரியைகள் சந்திப்பு நிகழ்ச்சி 20.09.2026 அன்று ஈரோடு மெரினா ரெஸ்டாரண்ட் விவாஹா ஹாலில் நடைபெற்றது.

இந்நிகழ்ச்சியின் துவக்கமாக மறைந்த பள்ளியின் தலைமை ஆசிரியர் ஓய்வு மு.தமிழ்மணி அவர்களுக்கும், மறைந்த மாணவர்கள் மோகன், ஐயப்பன்,நந்தகுமார், மணிமாறன் ஆகியோர்களுக்கும், மறைந்த மாணவிகள் குணசுந்தரி,  சிவகாமி ஆகியோர்களின் புகைப்படங்களுக்கு மலர் தூவி மரியாதை செலுத்தப்பட்டு 2 நிமிடம் மௌன அஞ்சலியும் செலுத்தப்பட்டது. 

முன்னாள் மாணவர் மரு.திவாகரன் வரவேற்புரை நிகழ்த்தினார். இந்நிகழ்ச்சியில் 1991-1999-ல் பள்ளியில் பணியாற்றிய ஆசிரியர்கள் மற்றும் ஆசிரியைகள் 11 நபர்களும், மாணவர்கள் 33 நபர்களும், மாணவிகள் 14 நபர்களும் என குடும்பத்துடன் 120க்கும் மேற்பட்டவர்கள் இந்நிகழ்ச்சிக்கு வருகை புரிந்து சிறப்பித்தனர். அனைத்து ஆசிரியர், ஆசிரியைகளுக்கு சால்வை, சந்தன மாலை அணிவித்து நினைவு பரிசு வழங்கி கவுரவிக்கப்பட்டது.

ஆசிரியர்கள் சிறப்புரை வழங்கிய போது, நூற்றாண்டை கடந்து இயங்கி வரும் இப்பள்ளியில் 1991-99 வரை பயின்ற மாணவ, மாணவிகள் இணைந்து நடத்தும் இந்த சந்திப்பு நிகழ்ச்சியில் பங்கு பெறுவதில் மிகுந்த மகிழ்ச்சி அளிக்கிறது எனவும், ஆசிரியர் பணி ஆற்றுவது எங்களுக்கு பெருமையாகவும், எங்களை நீங்கள் கவுரவம் செய்த நிகழ்வை பார்க்கும் போது தேசிய, மாநில நல்லாசிரியர் விருது பெற்றது போன்ற மகிழ்ச்சி ஏற்பட்டுள்ளது எனவும், ஈரோடு மாவட்டத்திலுள்ள அரசு பள்ளிகளில் முதலிடத்தில் உள்ள நம் பள்ளியில் பயின்று தற்போது சிறப்பான நிலைகளில் உள்ள உங்கள் அனைவரையும் பார்க்கும் போது அரசுப்பள்ளியில் பணியாற்றுவது பெருமையாக உள்ளது எனவும், எங்களது பணியில் ஏற்படும் மிக அதிகமான அழுத்தங்கள் இந்நிகழ்ச்சியில் பங்கு பெற்றவுடன் காணாமல் போய்விட்டது எனவும், 27 ஆண்டுகளுக்கு பின்னர் மாணவ, மாணவிகளை சந்திப்பதில் பெரும் மகிழ்ச்சி அடைந்துள்ளோம் எனவும் அகம் மகிழ்ந்து தெரிவித்தனர். மேலும், இந்நிகழ்ச்சியினை ஏற்பாடு செய்தமைக்கு தங்களது வாழ்த்துகளையும் தெரிவித்துக்கொள்வதாக தெரிவித்தனர்.

மேலும், இவ்விழாவில் பங்குபெற்ற முன்னாள் மாணவர்கள் மற்றும் மாணவிகள் ஒவ்வொருவராகப் பேசி தங்களது பள்ளிப்பருவ நினைவுகளையும், ஆசிரியர்களுடனான சுவாரசியமான அனுபவங்களையும் பகிர்ந்து கொண்டு மகிழ்ச்சிக்கடலில் மூழ்கினர். பின்னர், முன்னாள் மாணவ, மாணவியர்கள் மற்றும் ஆசிரியர் ஆசிரியைகள் இணைந்து குழு புகைப்படம் எடுத்துக்கொண்டனர். அதன் பின்னர், ஆசிரியை, ஆசிரியர்கள், மாணவர்கள், மாணவிகள், அவர்களது குடும்பத்தினர் ஆகியோர்களுக்கு இசை நாற்காலி, இசை சுழற்பந்து, லக்கி கார்னர் ஆகிய போட்டிகள் நடத்தப்பட்டு வெற்றி பெற்றவர்களுக்கு பரிசுகளும் வழங்கப்பட்டது. இப்பரிசுகளை முன்னாள் மாணவர் அட்சயரங்கன் அவரது ஸ்கந்தா டிரேடிங் அன்ட் டிரேடிங் டிரைனிங் நிறுவனத்தின் சார்பில் வழங்கினார்.  மாணவ மாணவிகள் மற்றும் அவர்களது குழந்தைகள் பங்கு பெற்ற பாடல், நடனம் உள்ளிட்ட கலை நிகழ்ச்சிகளும் நடத்தப்பட்டது. முன்னாள் மாணவி சகானா நன்றியுரை நல்கினார்.

இந்நிகழ்ச்சியில் ஆசிரியர்கள் பாலசுப்பிரமணியம்.தங்கராஜ், ஆசிரியைகள்.ஜெயஸ்ரீ, உமாதேவி, ராணி, வி.ஏ.விஜயா, அம்சராணி, திலகலெட்சுமி, மகேஸ்வரி, சாந்தி, சீதாலெட்சுமி ஆகியோர் கலந்து கொண்டனர். இதற்கு முன்னர் 19.02.2012 அன்று முதலாவது சந்திப்பு நிகழ்ச்சியும், இரண்டாவது சந்திப்பு நிகழ்ச்சி 10.02.2019 அன்று மிகச்சிறப்பாக நடத்தப்பட்டு இருந்தது.

பழைய நினைவுகளை புதுப்பித்து, நெகிழ்ச்சியையும், உற்சாகத்தையும் தந்த இந்த மூன்றாவது சந்திப்பு நிகழ்ச்சிக்கான ஏற்பாடுகளை அனைத்து முன்னாள் மாணவ மாணவிகள் சார்பாக மணிகண்டன்;, மரு.திவாகரன், அட்சயரங்கன், தியாகு, சரவணகுமார், அழகிரி, அமுதா ஆகியோர் மிக நேர்த்தியாக முன்னின்று ஏற்பாடு செய்திருந்தனர்.